Курсот опфаќа тематика поврзана со циркуларната економија како нов концепт за справување со проблемите поврзани со недостигот на ресурси, економската одрживост и деградацијата на животната средина. Дополнително, во курсот се анализираат и зелените ИКТ со посебен фокус на земјоделството.
Преглед на курсот
| Поглавје | Детали |
| Партнер | Универзитет „Св. Климент Охридски“ – Битола,
Факултет за информатички и комуникациски технологии |
| Наслов | Циркуларна економија и зелени ИКТ |
| Услуга | Курс |
| Целна група | Сопственици на мали и средни земјоделски претпријатија, индивидуални фармери, вработени во јавна администрација, стартапи. |
| Формат | Работилница со настава во живо. |
| Фокус на клучни технологии | Интернет на нештата (IoT), компостирање, примена на вештачка интелигенција (AI) во земјоделството, Crowdfunding платформи. |
| Статус | Подготвен за понуда. |
| Засегнати страни од МСП/ЈА | Фармери, потенцијални фармери, советници за земјоделство, инспектори за храна, инспектори за животна средина, земјоделски претприемачи, ИТ претприемачи. |
| Барања за учество | Нема. |
| Проценето времетраење | 16 часа. |
Опис на курсот
Циркуларната економија претставува развоен концепт кој промовира штедење на ограничените економски ресурси и намалување на создавањето отпад. Овој концепт претставува сериозна алтернатива на линеарната економија која се води според принципот: „земи – произведи – употреби – фрли“ и нуди нов модел според принципот: „земи – произведи – употреби – поправи – повторно употреби – рециклирај“. Циркуларната економија се карактеризира со ниска потрошувачка на енергија, ниски емисии на загадувачки материи и висока ефикасност при користењето на ресурсите во текот на економската активност. Исто така, циркуларната економија ги менува бизнис моделите, навиките и начинот на размислување, како на производителите, така и на потрошувачите. Циркуларните производи се дизајнираат на начин што ќе овозможи нивно лесно и повторно користење, поправање, обновување и рециклирање. Овој концепт претставува нов начин на создавање вредност и просперитет кој дава еколошки придобивки (намалено загадување на животната средина, употреба на обновливи извори на енергија, еколошки иновации итн.), општествени придобивки (зголемена свест кај луѓето за важноста на животната средина, зелен транспорт, зелена архитектура итн.) и економски придобивки (намалени трошоци за суровини и енергија, минимизирање на употребата на скапи и ограничени ресурси, намалување на трошоците за управување со отпад, отворање нови работни места итн). Притоа, новите информатичко-комуникациски технологии (ИКТ) всушност во голем дел ги определуваат можностите на овој концепт. Станува збор за технологиите од Четвртата индустриска револуција (Индустријата 4.0 или ,,Паметната” индустрија) како што се: роботиката, вештачката интелигенција, биотехнологијата, интернетот на нештата (IoT), 3Д, 5G технологии, машинското учење итн. Оттука, со овој курс ќе им се овозможи на учесниците стекнување на знаења и вештини од областа на циркуларната економија и зелените ИКТ со посебен осврт на земјоделството. Учесниците ќе стекнат искуства во употребата на дигитални алатки во земјоделството. Со завршувањето на курсот, учесниците ќе бидат во можност да се справат со некои современи општествени, економски, еколошки и технолошки феномени, проблеми и предизвици.
Дополнителни информации за курсот
| Категорија | Детали |
|
Стекнати вештини |
Учесниците ќе стекнат знаења и вештини, вклучувајќи: |
| -разбирање на економијата како наука за ограничените ресурси, како и разбирање на нејзината поврзаност со животната средина.
-стекнување знаења за досегашната економска состојба во која преовладува концептот на линеарна економија и како да се транзитира кон новиот развоен концепт на циркуларна економија. -стекнување знаења за општествено-економскиот контекст на циркуларната економија. -стекнување практични знаења за тоа како овој концепт би можел да се имплементира на ниво на бизнис (циркуларен бизнис). -стекнување знаења за новите зелени ИКТ и нивното влијание врз бизнисите и земјоделството. |
|
| Методи на учење | Предавањa, практична работа во групи (вежби, групни дискусии, студии на случај), дигитални симулации итн. |